咀咀護理

講到「護膚」好多時都唔會諗起個咀，因為如果唔係乾到甩晒皮，都唔會覺得有咩特別問題。但其實個咀一樣需要滋潤同補濕，仲可以幫佢做埋去角質同敷mask添！本人一向其實都無乜特別護理咀唇，只係見乾乾地就搽下Lip Balm咁。直到我最近一個FB post介紹Eminence Lip Balm時，淨係影個咀先留意倒「乜原來有條咁深嘅唇紋嘅？？」

驚訝之後就諗起去唇紋嘅唇部去角質，仲做埋完整嘅＜唇部護理3部曲＞！魔戒3部曲我就聽過，咩係唇部3部曲呀？

第一曲當然係去角質，我相信大家都唔會有幫唇部去角質嘅習慣，咁一定要試試，因為淨係做完呢個step都已經好唔同。個咀係即刻超滑同軟熟！同埋因為要準備敷唇膜，所以最理想就係先除去唇上死皮先敷lip mask。敷面膜都係一樣，因為就咁用洗面奶洗面只係可以去除多餘油脂同污垢，死皮未必洗得走，如果有d死皮係度隔住左，梗係覺得吸收冇咁好㗎呢～ 就好似大家洗完面再用爽膚水抺一抺都仲會抺得出黑色野，然後心諗我塊面有冇咁污遭呀⋯⋯所以簡單黎講，敷咩之前都要先徹底清潔同去角質！

好，明白！咁係點用㗎？首先，如果搽左唇膏就要洗走d唇膏先啦，然後用手指或棉花棒點少少唇部磨砂係唇上，我冇加水稀釋因為佢本身唔係太竭，就咁用手指磨就ok~ 佢個質感係啫喱狀，所以淨係呢個step都好滋潤。我既用法同網上寫有d唔一樣，我冇做到"Leave on for 5 mins"呢個步驟，因為一來慳時間，二來下一個step敷唇膜先leave on啦～隨個人喜好，我相信分別唔會好大=] 咁我就用手指磨左1-2分鐘，磨埋兩邊咀角同上下唇周邊皮膚，唔好嘥呀嘛。磨到認為夠喇就用水洗走佢。

洗走磨砂後，抺返乾個咀就可以搽唇膜喇！唇膜同樣唔需要加水稀釋，因為佢係一搽即溶，同埋個質地都幾稀下㗎其實。呢個我用棉花棒搽因為唔想手指吸收左d產品，哈哈，雖然唔知會唔會但係感覺上係會！所以我用棉花棒搽嘅，本來諗住敷5分鐘就算，但係見佢仲好濕潤咁，所以敷多陣啦～最後敷左15分鐘，然後用水洗走佢。

 洗走晒唇膜再抺番乾個咀後，就搽上Lip Balm。呢個應該大家都識，你可以用手指搽，棉花棒搽，唇掃搽，或者有d人鍾意就咁擺埋去個咀度搽都得，隨你喜歡！

FAQs 你可能會問：

1. 係咪一定要做齊3個step㗎？
唔係，任何一個step都可以獨立進行。你可以去完角質就算，或者訓覺前搽上唇膜敷成晚都得！

2. 要幾耐用一次㗎？
如果你咀唇較乾同多死皮的話就可以用密d，一個星期一次倒啦。如果一般唇部保養的話，就隔個星期或一個月用一次都ok㗎喇～